నేనూ ఆమె 2

ఆమె చేరువౌతోందనగానే ఏదో ఆనందం
ఎప్పుడెప్పుడు ఆమె వొళ్ళో వాలదామా అనే ఆరాటం
పోద్దున్న లేచిందగ్గర్నుంచీ
ఏంటో వెధవ హడావుడి
ఒకటే ఉరుకులూ పరుగులూ
ఏం పొందాలనో
కోరికలూ ఆశలూ బరువులూ బాధ్యతలూ
అసంతృప్తులూ నిరాశలూ బంధనాలూ నిస్పృహలూ
ఎన్ననీ...
ఇన్నింటి మధ్య కొట్టుమిట్టాడుతున్నా
సాయంత్రమౌతోందంటే చాలు
ఉత్సాహం పొంగుతుంది
ఇక ఆమె వస్తుందనీ!
ఆమె చేరువౌతోందనగానే ఏదో ఆనందం
ఎప్పుడెప్పుడు ఆమె వొళ్ళో వాలదామా అనే ఆరాటం
ముందు మెల్లగా పలకరిస్తుంది
సేద తీరేదాకా ఊసులాడుతుంది
కడుపు నిండాకా ప్రేమగా జోకొడుతుంది
మళ్ళీ తెల్లారేదాకా రమిస్తూ
మళ్ళీ మర్నాటి పోరాటానికి కావలసినంత శక్తినిస్తుంది
నిశ - యామిని - రాతిరి
అన్నీ ఆమె పేర్లే!!

విట్టుబాబు
22.01.2018