నేనూ ఆమె

ఆమె సమక్షంలో
నేను లుప్తమైపోయి తానై మిగులుతాను
జీవన పోరాటంలోని జయాపజయాలు
ఒత్తిడులు చిరాకులు
మనోఫలకంపైన జ్ఞాపకాలన్నీ
ఆక్షణాన మాయమైపోతాయి
నేనెవరో ఏఁవిటో మరచిపోయి
తనలోనే ప్రవేశించి
అణువణువూ గాలించి
నన్ను నేను వెతుక్కునే ప్రయత్నం చేస్తాను
ఆ మైమరపులో
నన్ను నేను కొత్తగా సాక్షాత్కరింపజేసుకుంటాను
ఇంతకీ ఆమె ఎవరో తెలుసా
శరత్తునీ హేమంతాన్నీ
శిశిరాన్నీ వసంతాన్నీ
తనలోనే యిముడ్చుకున్న
ప్రకృతి కాంత!!

విట్టుబాబు
31/12/2017